संघटना हेच सूत्र बनावे
निर्भयता बळ आस्था यांचे एकी हे दैवत समजावे
जे जे वंचित त्यांच्यासाठी संघटना हे सूत्र बनावे ||धृ||
भरभरून मी धन मिळवावे, जग जिंकोनी घर सजवावे
अपयश चिंता अपमानांचे दिवस दरिद्री दूर सरावे
आप्तेष्टांच्या विधीलीखिताचे काळे वास्तव पूर्ण पुसावे
उघड्या डोळ्यांनी हे दुर्लभ स्वप्न साजिरे कसे बघावे ||
संघटना हेच सूत्र बनावे ||१||
भावतालीची पिसाट दुनिया अफाट गतीने धावत आहे
विश्वाच्या अंताला वेढूनी गणिती प्रज्ञा वाढत आहे
उद्योगांची चौखूर चक्रे रोज जिंकिती नवीन गावे
विज्ञानाच्या विस्फोतही अज्ञ जनांनी कसे जगावे ?
संघटना हेच सूत्र बनावे ||२||
दुरावती जन तुटकपणाने जो तो वेची अपुले नाणे
रानदांडग्या शर्यतीमध्ये चिरडून गेले चिमणे गाणे
एकाकी जन दुर्लक्षित जन आप्त एकमेकांचे व्हावे
केवळ आभाळाची देवा भिउनी कोणी किती भजावे ?
संघटना हेच सूत्र बनावे ||३||
आजवरी जे भिउनी राहिले पूर्ण अडाणी दुबळे झाले
परस्परांचे पाय ओढुनी होते तेथून मागे आले
एक जयांचे दुखणे त्यांनी समदु:खी बंधू समजावे
आणि एकता हेच अपुले यांच्यापुढती दैवत व्हावे
संघटना हेच सूत्र बनावे ||४||